قصيدة مكاوية عن أيام زمان عند أهل الحجاز

    شاطر

    كرته برمودا
    عضو مميز
    عضو مميز

    عدد الرسائل : 135
    تاريخ التسجيل : 23/10/2009

    مجايشي قصيدة مكاوية عن أيام زمان عند أهل الحجاز

    مُساهمة من طرف كرته برمودا في الثلاثاء 27 أكتوبر - 6:09


    قصيدة مكاوية على أيام زمان عند أهل الحجاز
    تموت من الضحك بالذات على هرج "سواليف" الحريم

    ********

    مين يتزكر؟ مين يتزكر؟ أيام راحت زي السكر؟
    الهم ما يقدر يدخل بيوتنا فيها لو يتمنطر
    لما نرش الخارجه ونجلس بالنا صافي ولا يتعكر
    اللي بيلعب كيرم واللي بيلعب إننن وحاله اتبعتر
    واللي حاطط تبسي بياكل حبة دقه وعيش مقمر
    واللي متسلبط عند ستو حكينا عن شيبوب وعنتر
    واللي معاه خاطر يكووه إلين ما يبان اللحم الأحمر
    مين يتزكر؟ مين يتزكر ؟ مين يتزكر؟
    أحلى زمان لمن نسمع يا أهل البيت وصفقه جيه من الدرجان
    وامي تقول وه يا ندامه باين هدولا الجيران
    أجري قوامن قول لأبوك يجبلنا فوفل ولبان
    وكربو حوت وكربو مر ونُقل من آخر دكان
    وأهلا وسهلا ستي خديجه وآنستينا يا أم فلان
    وهاتك بوس يحوس حوس ساعه وهما على الدرجان
    ويخص عليكي ليه ما جبتي سعاد وأمينه ودلش وأمان
    وبيني وبينك لو جابتهم لا يخلوا الحاره مروستان
    وشويه ويتملى المجلس وهاتك من هرج النسوان
    شفتي طبينة بنت عم شاكر مخبصه وشها كيف ألوان
    ولابسه كُرته أبو مرايه وكُندره حقت أمريكان
    لا والحرمه مسويه فُرمه وهي تهيت أبو وردان
    ولابسه الرشرش وخرص منقرش وبناجر وخلخال وتُعبان
    والله خساره في جتتها حرمه خسيسه ومالها أمان
    شايفه نفسها في عمى ونص وكأننا فـي عينها دبان
    وجده جميله تقول اتلموا ومالنا في عباد الرحمان
    وافسرلك يختي العافيه شاكلتي مره تايره عليا
    توصف لها ستي فتو مروخ وتقول لها ادهني منو شويه
    ولفلفي نفسك في الدقديل وخشي راسك فـي النامسيه
    وفريده تقول خلونا نرتب دخلة بنتي الجمعه الجيه
    نفسي أجيب لعابه ياأختي ونخليها ليله هنيه
    الزمي توحه لا سوني أحمد ولا صالحه بلطجيه
    وعندك كاكا ولا كرامه وإبتسام لطفي وحماديه
    طيب وطلبات اللعابه سيبي هادي الحاجه عليا
    صكر نبات وراس الصكر وهيل مكلل بالصينيه
    ودخان بستاني وورق الشام هي بنتنا يختي شويه
    تضحك سعده تقول ياجماعه نسيتوا حكاية الدبابيس
    نبغى نطزطز فيها الاخ اللي مسوي لنا فيها عريس
    وهرجه في درجه في تفاسير في ضحكه في غمزه في تشميقه
    ولعبة كمكم وحزازير وأشياء تفك عن الصدر الضيقه
    وهادي تقول لا تطالعي كتير وانتي عيونك زي بُريقه
    وهادي تدل على فرقنا وهادي تقول نازله سويقه
    عالم كانت زي الفل عالم هرجها موسيقه


    ********


    craezy4ever
    عضو ملكي
    عضو ملكي

    عدد الرسائل : 480
    العمر : 25
    الترفيه : الفوتو
    المزاج :
    المهنه :
    الهوايه :



    تاريخ التسجيل : 07/05/2009

    مجايشي رد: قصيدة مكاوية عن أيام زمان عند أهل الحجاز

    مُساهمة من طرف craezy4ever في الأربعاء 28 أكتوبر - 21:46

    الله نااااااااااااايس

    الله على هرج اهل مكه

    زي السكر

    يسلموو خيوو

      الوقت/التاريخ الآن هو الأحد 4 ديسمبر - 3:42