خلاصة تجربتي؟؟

    شاطر

    محمد العكبري
    عضو مميز
    عضو مميز

    عدد الرسائل : 174
    العمر : 27
    الترفيه : كشتات
    المزاج :
    المهنه :
    الهوايه :



    تاريخ التسجيل : 04/05/2009

    مجايشي خلاصة تجربتي؟؟

    مُساهمة من طرف محمد العكبري في الأحد 17 مايو - 16:22

    معوّض خير ياحيٍ تهقوى فـي الزمـان ومـال
    سنينـك لـو رقيـت بعدلهـا يطرحـك مايلهـا


    تعلّم وإعرف إن الدرب قدامـك سهـل وجبـال
    جبـال تطولهـا وجبـال بعيـونـك تخايلـهـا


    ومعوّض خير ياحيٍ وردت المـاء بـدون حبـال
    يطول بك الوقوف وشربـة المـاء ماتحصّلهـا


    وقوفك عند راس البيـر مايسقيـك لـو فنجـال
    ولاينفعك شـوف الجمـه اللـي منـت طايلهـا


    ومعوّض خير ياحيٍ خدعك من الرجـال أشكـال
    تشوف أشكالها وتحطهـا أرفـع مـن منازلهـا



    تعلّم من زمانك لاتصيـر مـن أجهـل الجهـال
    ترى في كـل يـوم تجيـك عبـره لاتجاهلهـا



    إذا ربي وهب لك عقل تلقى في الرجـال رجـال
    تعـرف اللـي يطلّـع قيمتـك واللـي ينزلهـا



    ترى من بعض مايندي الجبين ويحـرج الرجـال
    لياسـاق الميانـه فـي نـفـوسٍ ماتقبّلـهـا



    ومهما شفت في صاحبك من نخوه وطيبـة فـال
    ترى بعـض السجايـا كثـرة الإلحـاح يقتلهـا



    معاريف الرجال ديـون وديـون الرجـال ثقـال
    لياصرت متعافي ليـش تغـرق فـي جمايلهـا


    رصيدك في حياتك سمعتك مـع طيبيـن الفـال
    رجال الطيب والمعـروف بالمعـروف عاملهـا


    ولاتبـدي بجاهـك فـي مقـامٍ مايسـر الحـال
    ولاتشفـع لـنـاسٍ ماتنومـسـك بفعايلـهـا


    لياجاتـك تعذّرهـا مـدام العـذر لـه مدخـال
    ووقت الجـد قـول لهـا الصحيـح ولاتجاملهـا


    وخـذ منـي نصيحـه لاتصـدق كـل ماينقـال
    يجـرك للنميمـه ليـن يطـرحـك بحبايلـهـا


    يجيلـك ناقـل النمّـات بهـروجٍ تغـث البـال
    سوالف في قفاك وحظـك أطيـب يـوم تجهلهـا


    يبـرر بالحميـه والصداقـه شينـة الأفـعـال
    يجمّـل صورتـه بعلومـه اللـي ماتجمّلـهـا


    ولو كانت حميه فيك رد المخطيـه فـي الحـال
    ولاكان إستمعهـا فـي قفـاك وجـاك شايلهـا


    ترى من جاب لـك ودّى وهـذي عـادة النقـال
    يحاول يقتنص من فمـك كلمـه لأجـل ينقلهـا


    ومثل ماقال عندك راح عنك وعند غيـرك قـال
    وزوّد عشر فوق الكلمـه اللـي كنـت قايلهـا


    تجنّب مجلسه لاتجلـس إلا مـع كريـم خصـال
    تحمّـل ميلتـه وإن ملـت ميلتـك يتحمّلـهـا


    ولاتصبر على الجار الردي لوهـي ثـلاث ليـال
    تضـرك جيرتـه لـوكـان بيبـانـك تقفلـهـا


    وبيع الدار بأول سومـةٍ تعـرض علـى الـدلال
    ورزقـك عنـد ربٍ كاتـب اللقمـه وكافلـهـا


    وبنتك لاتزوجهـا الـردي لوهـو كثيـر المـال
    تربيهـا علـى الطـالات وتـشـوّه سلايلـهـا


    وكم من لاش يرمي خيبة إبنه فوق راس الخـال
    لوإن الخال مـن روس الرجـال ومـن دلايلهـا


    ليامنـك عرفـت تميّـز الطيّـب مـن البطـال
    وفادتك التجارب فـي الحيـاة وفـي مسايلهـا


    وكشفت الفرق مابين الصحيح وحيلـة المحتـال
    وتعلمت الفراسـه فـي الوجيـه اللـي تقابلهـا


    بعد هذي ترى مالك غنى عـن صحبـة العقّـال
    يدلونـك بـرايٍ ينقـض الـدعـوه ويفتلـهـا


    يقولون الرجال اللـي سوالفهـم حِكـم وأمثـال
    ليامن ضاعـت الحيلـه يـدل القـوم عاقلهـا .....


    نصيحة واحدٍ جرّب وشاف من الزمـان اهـوال
    يقـدّم لـك خلاصـة هجـرةٍ جـرّب هوايلهـا



    تحياتي

    محمد بن عبد الله العكبري

    ابو صباء
    عضو ملكي
    عضو ملكي

    عدد الرسائل : 571


    تاريخ التسجيل : 06/12/2008

    مجايشي رد: خلاصة تجربتي؟؟

    مُساهمة من طرف ابو صباء في الإثنين 18 مايو - 19:14

    رصيدك في حياتك سمعتك مـع طيبيـن الفـال
    رجال الطيب والمعـروف بالمعـروف عاملهـا

    صح لسانك
    تقبل مروري

      الوقت/التاريخ الآن هو الأربعاء 7 ديسمبر - 20:31